家族序大訪談
ㄧ、受訪者基本資料
名姓：黃簡梅（昭和元年１９２６年三月初出世，今年將近欲９０歲）
佮我ê關係：阿媽佮孫仔
佗位人：阮阿媽是嘉義人
蹛過啥物所在：嫁阮阿公進前阿媽蹛佇復金村湖底，細漢的時捌蹛過大林，後來嫁予阿公了後佮阿公蹛佇竹崎鄉坑頭村。
經歷：阮阿媽無讀過冊嘛毋捌字，嫁予阮阿公了後就綴阿公做山（種果子），若無就佇厝內𤆬囡仔、做家內事。
對阿媽來講較重要的代誌：
１９２６年 阿媽出世
１９４５年 佮阿公結婚
１９４６～１９６５年 佇這幾年內底阿媽生七個囡仔，阮阿爸排第六。
１９７０年 頭一个孫出世
１９９５年 頭一个乾仔孫出世
１９９６年 阿公過身
二、阿媽ê人生中較大項ê代誌抑是感覺較值得講ê代誌。
１阿媽的愛情故事
佇阿媽十九歲（差不多是１９４４～１９４５彼的時）的時陣，阿媽的阿爸（嘛就是我的外祖）聽著消息講日本政府想欲揣一寡仔查某兵仔去南洋鬥相共（講是按呢講毋過其實是去做慰安婦，彼當陣阿媽的姐妹仔伴有去，聽講尾仔伊的下場毋是講偌好。），為著無愛予查某囝去遐爾遠的所在受苦，阿祖就趕緊去叫媒人婆揣看覓庄頭附近敢有猶未結婚的少年家，結果媒人婆探聽著阮阿公，雖然講阿祖感覺阮阿公的經濟無講偌好（彼當時阮阿公佇有錢人兜的厝內做長工，生活誠困苦。），毋過為了無愛予查某囝去遐爾遠的所在做工課，只好共查某囝嫁過去。
日子攏無選揀，無聘禮嘛無嫁粧，一禮拜了後阮阿媽著嫁（搬過來蹛）過來矣，連翁生做是圓的抑是扁的攏毋知，對遮的環境攏無了解，阿媽講伊彼當陣心內誠驚惶，毋知影伊的未來會變成按怎樣？過幾工了後（彼當陣阿公去共日本政府做工課，日本時代政府三不五時就會揣查埔去做工課，毋管你是毋是有咧做穡，是毋是有家庭愛照顧，怹揣你去你著愛去。這敢若是義務的。）阿媽看著一个生份人遠遠的對外口行對厝來，阿媽足兇狂的走入厝內問大家講：「阿母，厝外有一个生份人對外口一直行入來，你看！」查某阿祖看著人笑到腹肚攬咧，過一時仔才講，講：「阿彼个就是恁翁阿！」阿公嘛感覺講奇怪，哪會轉來厝了後就多一个某。
雖然講阿公佮阿媽是佇這種狀況結婚ｅ，毋過我感覺會出來阿媽咧講這件代誌的時，伊的面頂懸有一種幸福的笑容。
２阿公的換帖兄弟－廷伯（這是直接聽音翻過來的）
廷伯是佮阿公做伙大漢的兄弟，伊是阮彼个庄頭唯一健康對南洋轉來的兵仔，阿媽說伊轉來的時陣伊的爸母閣佇庄頭請幾若場的布袋戲予人看。有人歡喜就有人傷悲，廷伯有提幾若件仝鄉兵仔的遺物轉來予怹厝內的人，遐的戰死兵仔的家屬看著遮的有血的衫佮褲攏哭甲欲昏昏去矣。
聽阿媽共我講廷伯佇南洋的時陣因為落尾戰爭的狀況變kah足吃力矣，日本的物件攏足欠缺e（連島內的人嘛食不飽），尾仔怹甚至閣無物件通食，為著欲活下去，怹逐項攏食，甚至開始揣屍體食，（我進前敢若有分享過）這件代誌實在是傷予我感覺震撼矣。
３阿媽感覺國民政府佮日本政府的差別
阿媽講伊彼當陣欲顧腹肚就袂赴矣，所以無啥咧注意時勢的變化，而且因為蹛佇山內，所以對外口的消息嘛毋是講足了解矣，毋過伊有感覺著阿本仔佮國民政府的公務人員有足無仝款的所在，比如講警察好矣，阿本仔警察雖然講權力有較大嘛較嚴格毋過至少怹袂來厝內共你刁難，治安嘛較好，國民政府的警察仔無仝，三不五時就來厝內泡茶，看誰人無順眼就共人創治，這是阿媽感覺較討厭的所在。
三、訪談後我ê心得
我感覺這擺的序大訪談足趣味ｅ，我聽著足多阿爸佮阿爸的兄弟姊妹細漢的時趣味的故事，我才知影原來阿爸的脾氣佮我仝款䆀、仝款孽，阿媽對伊頭一个囡仔開始講起講到最後一个，遮的攏是伊作阿母的心得（遮的故事敢若無符合台灣史，所以就無寫入來矣）。阿媽閣有共我講進前查某人用的衛生用品（衛生棉）閣有尿巾仔是用布做的，用了後閣愛用手洗，這件代誌予我感覺足意外ｅ，以早的查某人實在是足辛苦ｅ。
這擺的訪談佮阿媽講kah足歡喜ｅ，我從來毋捌佮阿媽按呢開講過，我嘛是感覺足歡喜。毋過因為阮講kah傷歡喜矣，阿媽情緒傷激動，伊的高血壓閣攑起來矣，頭殼疼，著先予伊去休睏矣。（所以這擺的訪談分作兩擺問，我實在是感覺足失禮矣。）。
頭擺（差不多過年的時陣問的）佮阿媽開講的內容攏是厝內的代誌較濟，所以甘焦寫一件代誌入來爾爾（愛情故事彼部分），第二擺（差不多４月的時陣問的）開講的內容雖然較接近台灣的歷史，毋過阿媽無講傷濟（毋講著較深入的物件，有一寡仔代誌，過了傷久矣伊嘛無偌確定，所以我就無寫出來矣。）毋過佇開講的過程中，我感覺會出來，伊無甲意講著這款kah接近政治的議題，開講的過程中伊閣會問我講：「妳敢有去參加學運無？」、「勿啦，政治的代誌勿插啦！」後來上課的時陣聽著老師講，序大有可能是知影毋過怹無想欲講爾爾，予我雄雄想通為啥物阿媽講的內容甘焦是日本時代的代誌，我感覺阿媽有可能真的知影一寡仔代誌，只是伊無想欲講。對這著會使知影以早咱的政府做遐的傷害咱的代誌予咱的影響有偌深矣。
我佮阿媽的生活有足濟無仝的所在，比如講：我毋免操煩我的後一頓飯佇佗位，嘛毋免煩惱敢會有警察來厝內刁難，而且我閣有遮爾便利的生活，我感覺生佇這个時代實在是傷過幸福矣！
